Eusko Jaurlaritzako Informatika Elkarteko (EJIE) euskara planeko koordinatzaileari elkarrizketa:

Alberto Martinez de Gereñu

Zer da EJIE? Zein da zuen lan esparrua?

EJIE sozietate publiko bat da, Informazioaren eta Komunikazioaren Teknologien (IKT) esparruko zerbitzuak eskaintzen ditu, eta haren xede nagusia Euskal Sektore Publiko moderno eta eraginkor bat lortzen laguntzea da, segurtasuna eta kalitatea bermatuz.

Esan duzu EJIE EJ-ko Sozietate Publiko bat dela. Berez, ez zarete administrazioa, baina publikoa bai. Nola eragin dizue bukatu berri den Euskararen Erabilera Normalizatzeko Planaren V. Plangintzaldiak?

Egia da, ez gara administrazioa, baina esparru publikoan gaude. Euskara Normalizatzeko Planaren dekretuak esaten du Sozietate publikoek, zuzenbide pribatuko erakunde publikoek, eta sektore publikoko fundazio eta partzuergoek euskararen erabilera bermatuko dutela herritarrekin zuzeneko harremanak dituzten zerbitzuetan, herritarrak aukera izan dezan nahi duen hizkuntza hautua egiteko.

EJIEk herritarrekin harreman zuzenak baditu, bi arlotan batik bat: Zuzenean zerbitzuan (eta bertan ELZ edo CAU barneko zerbitzuan) eta KZGunea proiektuan. Dena den, gure bezero nagusia Eusko Jaurlaritza da, eta herritarrekin eta langile publikoekin harremanak euskaraz izatea beti izan da helburu garrantzitsu bat EJIEn. Ahaztu gabe EJIEko langileen arteko harremanak euskalduntzeko egiten ari garen lana.

Bi helburu nagusi horiek lantzeko (zerbitzu hizkuntza eta lan hizkuntza) abiatu zen 2014an euskararen erabilera normalizatzeko plana EJIEn.

Zein da erabilera planaren egitura? Euskara batzorderik edo antzekorik baduzue?

Bai, Planarekin hasi ginenean Euskara Batzorde bat sortu genuen, eta batzordearen bileretan ideiak, egitasmoak, ikastaroak etab. erabakitzen eta onartzen dira. Laguntza handia egoten da gure atzean, Emunek ematen diguna. Enpresak ere batzordeari askatasun handia ematen dio eta, berak ekintza guztiak onartu behar baditu ere, ez digu inoiz batzordetik ateratako ekintzarik atzera bota.

EJIEko euskara batzordeko kideak

Zeintzuk dira zuen asmoak epe laburrera?

2018an erronka handia dugu: Bikain ziurtagiria lortzea. Emunen laguntzaz, ziurtagiria lortzeko ditugun gabeziak eta hobetzeko puntuak gainditzen hasiko gara, urteko bigarren seihilabetekoan ziurtagirira aurkezteko asmoz.

Ziurtagiria lortuz gero, seguruenik oinarrizkoa izango da, baina hor ez gara geldituko; hurrengo urratsa izango da Bikaineko zer hobetuak lantzen hastea.

Jakina, planarekin jarraituko dugu eta ohiko ekitaldiak eta beste berri batzuk martxan jartzeko asmoa dugu. Aurten plangintzaldi berria hasiko denez, honen helburuak zehaztu eta landuko ditugu.

Eta epe luzera? Zeintzuk dira zuen helburuak?

Alde batetik, aurreko galderan esan dudana: Bikain ziurtagiriaren hurrengo urratsa edo urratsak lortzeko asmoa badugu. Baina eguneroko euskara erabilera handitzea da gure benetako erronka. Enpresaren aldetik, lankideek formazioa jasotzeko eta trebetasuna handitzeko ahalegin bikaina egin da. Dena dela, Informatikako arloan ingelesa eta gaztelania asko erabiltzen dira eta mundu horretan euskara sartzea ez da erraza. Horregatik diot erronka handia dela.

Baina pixkanaka-pixkanaka lankideen artean konpromiso bat hazten ari da: euskara gero eta gehiago erabiltzea. Konpromiso hau gabe, gure ahalegin guztiak alperrik izango lirateke. Horregatik etorkizun ona ikusten dugu. Ea egia den…

 

Gorka Blanco (Emuneko kidea)

Irakurtzen jarraitu...

Apirilaren 26-27an Lasarte-Orian egingo den Udaltop topaketan hizkuntza erroldak izango ditu hizketagai Kristina Pavo, Emuneko teknikariak. Gaiaren inguruan aurrerapentxo bat egiteko eskatu diogu.

Kristina Pavo, Emuneko teknikaria.

“Hizkuntza erroldak herri administrazioen eta  herritarren arteko komunikaziorako estrategietako bat delakoan gaude.  Baina nola bideratzen ditugu herri-administrazio eta herritarren arteko komunikazioak eta harremanak?

Hainbat aldagai aztertuz jasotako informazioaren berri emango dugu, ikuspegi kuantitatibotik (hizkuntza errolda kopurua, mapa herrialdeka, hizkuntza errolda duten herri administrazioak zeintzuk diren, udal osoan edo sail batzuetan ezarrita duten…) , ikuspegi funtzionaletik (helburuak…)  eta ikuspegi historikotik (sorrera urteak, herritar kopuruak, aldaketa kuantitatibo zein kualitatiboa…).

Ikuspegi kualitatiboagoa ere aztertu dugu, ustez, baliagarriak diren praktikak eskura jarriz.

Esan beharra daukagu lan hau burutzeko guztira 187 herri administrazioekin bideratu dugula harremana. Horietatik, 131k erantzun du, emaitza kuantitatiboetan aurkeztuko dugun datuen arabera. Praktika baliagarriak irudikatzeko, berriz, 3 aukeratu ditugu. Horretarako bi irizpide kontuan izan ditugu:  irizpide geografikoa eta  praktika horien berezitasunak edota desberdintasunak.

Ondorio nagusi batzuk ere azalduko ditugu Udaltopen.”

Udaltop topaketan izena emateko epea apirilaren 19ra arte dago zabalik.

Irakurtzen jarraitu...

Gipuzkoako Foru Aldundiaren Udal<>ekin egitasmoaren babespean “Administrazio kontratuetan bete behar diren hizkuntza-baldintzen prozedura, klausulak eta jarraipenerako estandarizazio-proposamena” osatu berri dute Aretxabaleta, Azpeitia, Bergara, Eskoriatza, Lezo, Oiartzun, Tolosa eta Zarauzko udalak, Uema eta Gipuzkoako Foru Aldundiak.

 

Nekane Jauregi (GFA) ,Maje Umerez (Aretxabaleta eta Eskoriatza), Patxi Saez (Azpeitia), Joxemari Iraola (Lezo), Aitziber Arnaiz (Oiartzun), Miren Aburuza eta Imanol Haro (Uema), Maripi Laskurain (Bergara), Iñaki Azaldegi (Tolosa) eta Maite Etxaniz (Zarautz) izan dira lantalde honetan aritu diren administrazioko teknikariak.

Gipuzkoako Foru Aldundiko teknikari den Nekane Jauregik labur zerrendatu ditu egitasmo honen xehetasun orokorrak eta, taula batean jaso ditu, zehatz-mehatz, enpresek bete behar dituzten hizkuntza baldintzak.

Irakurtzen jarraitu...


 Joxean Amundarain, Gipuzkoako Foru Aldundiko Euskara Zerbitzuko Normalkuntza programetako  atalburua da.

Bizitza petrala de tarteka. Azken urte hauetan petralaldi horietako bat bizi izatea egokitu zait; ondorioz, Donostialdeko makina bat erietxe, anbulatorio, gizarte zerbitzuetako bulego … bisitatzeko suertea izan dut. Azkena gaur bertan.

Halako toki gehienetan egoten da harrera gune bat  eta hara joaten naiz ni, euskara ahoan eta  TELPeko ikastaroetan ikasitakoa poltsikoan dudala. “Egun on …” Denetako bizipenak izan ditut, halere oraindik ere harritu egiten naiz euskaraz egin eta harritu aurpegia jartzen didatenean. Nola da posible hori gertatzea hizkuntza bat ofiziala izan eta 30 urtera? Non eta erakunde ofizial edo hitzartu batean?

Donostialdean bizi dut egoera hau, jakina; segituan konturatzen naiz zer izan daitekeen zerbitzu publikoak euskaraz jaso nahi izatea Euskal Herriko hainbat eta hainbat txokotan.

Jakina, mahaiaren beste aldetik ere bizi izan dut egoera hori. Lanean askotan izan dugun euskarazko zerbitzuen erabilera mintzagai. Hala esan izan digute tarteka,  gutxi erabiltzen direla euskarazko zerbitzuak (bide batez, zer da gutxi, zer da asko?), herritarrek ez dituztela (behar adina) eskatzen, aldaketa handiegiak egin beharko liratekeela, etab.

Eta inoiz txunditu izan naiz antolatu izan diren hainbat ekimenen ondoren ez delako kexarik argitaratzen edo kezkatu egiten naiz  hainbaten ahaleginek ez dutelako nahi izango genukeen (edo merezi izango luketen) erantzuna izan. Poztu ere, poztu egiten naiz, jakina, esaten didatenean berrogei mila gipuzkoarrek baino gehiagok harremanak euskaraz izan nahi dituztela Ogasunarekin.

Euskaldun aktibo naizen aldetik eraginkorrago nola izan jakin nahi dut. Administrazioko langile naizen aldetik herritarrek euskarazko zerbitzuak erabili ditzatela nahi dut, administrazioaren euskarazko eskaintza ikusgarriago egin nahi dut. Horretarako ezinbestekoa dut teoriekin janztea, ikerketak ezagutzea eta praktika zehatzen berri izatea.

Kezka horiek ditudalako joango naiz aurten Udaltopera. Beno, ez bakarrik horregatik, aspaldi ikusi gabeko lagunak ikusi nahi ditut, lankide berriak ezagutu nahi ditut, gure arlo profesionalean ze kezka dauden ezagutu nahi ditut … Baditut hamaika arrazoi aurten Lasartera joateko, eta zuk?

Irakurtzen jarraitu...

Euskara Entitate Publikoetan jardunaldiak ospatuko dira datorren otsailaren 2an Arabako Teknologi Parkean, Miñaon, Hizkuntza Politikarako Sailburuordetzak antolaturik.

Jardunaldi honek ezarriko du HPSren eta erakunde hauen arteko elkarlanaren abiapuntua euskararen erabilera normalizatzeko planaren testuinguruan, besteak beste, herri erakundeetan euskararen erabileraren normalizazioan lortu den betetze mailaren ebaluazioari begira, eta hurrengo plangintzaldian ekin beharko diegun arloei begira.

Gaia kokatuko duten hitzaldi teorikoez gain, World Kafea deritzon talde dinamika bat egingo da goizean zehar. Partaideek, beraien esperientziak kontatu, zein zailtasuni aurre egin behar izaten dieten azaldu eta zein premia dituzten adierazi ahal izango dute. Saio honek guretzat berebiziko garrantzia dauka, hemen jasotakoak, gure lana zein norabidetan joan beharko den ikusten lagunduko baitigu.

Era berean, erakunde hauetan euskararen normalizaziorako bidean darabiltzaten praktika onak ezagutzera emango dira arratsaldeko saioan.

Herri Administrazioetan Euskara Normalizatzeko zuzendaritzak lehentasunezkotzat jotzen du sozietate publiko eta zuzenbide pribatuko ente publikoei laguntza eskaintzea euskararen erabilera normalizatzeko esparruan eta beraien esku informazioa eta baliabideak jartzea. Orain arte HPSk enpresa pribatua eta Herri Administrazioaren inguruan hainbat lan egin du. 2010etik aurrera, sozietate publiko eta zuzenbide pribatuko entitate publikoekin lanean hasteko baliabideak ipini ziren eta apurka-apurka egoera ezagutu, beharrizanak aztertu eta ekimenak martxan ipintzen joan gara, entitate hauen izaera berezira egokituko den laguntza eta aholkularitza emateko. Ekimen horien artean, jardunaldiak antolatzeko egitasmoa landu dugu, ente publikoen inguruan lan egiteko asmoa erakutsi eta lan horrek hartuko duen norabidea azaltze aldera.


Patxi Martinez de Marigorta

Erakunde hauek euskararen erabilera sustatzeko abian dituzten planak berriztatu eta beraien ekimenei babesa eskaintzea da gure helburuetako bat.

Bidaltzailea: Patxi Martinez de Marigorta,  HPSn Herri Administrazioetan Hizkuntza Normalizatzeko zuzendaria
Irakurtzen jarraitu...