Erroakeko Martuteneko bulegoan 2014an egindako hausnarketaren emaitza izan zen ondorengo erronka: “Geure arteko harremanak euskaraz izatea nahi dugu“.

Horri erantzuteko Aldahitz metodologia egokitu genuen Martuteneko egoerara; 2014ko azken bi hilabeteetan aplikatu genuen, emaitza onarekin, eta egitasmoak jarraipena izan du 2015eko uztailera arte. Hilabete hauetan nabarmena izan da euskararen erabileraren gorakada.

diploma_ane_lantalan-page-001-page-001 (1)

2014ko azaroan Aldahitz metodologia aplikatzeko erabakia hartu genuen Martuteneko bulegoan. 8 langile daude bulegoan, eta denek dute euskararen ulermen maila, gutxienez.

Bulegoko kide guztiak bilera batera deitu eta egitasmoa aurkeztu genien: dinamikak urtea amaitu arte iraungo zuen eta 2 “gidari” aukeratu ziren euskarari eusteko barne harreman guztietan. Jarraipenerako 3 koloregrama egin ziren. Lehenengoa, abiapuntua izango zena, aurkezpenaren egunean bertan bete zuten; bigarrena, hilabetea pasata; eta, hirugarrena, interbentzioa amaitu eta 30 egunera. Era berean, astero, email bidez, interbentzioari buruzko iritzia, gidarien balorazioa eta aurrera jarraitzeko borondaterik ba ote zuten galdetzen zitzaien.

2015eko otsailean, dinamikaren balorazio bilera egin genuen. Langileak oso harro zeuden emaitzekin eta, euren iniziatibaz, egitasmoarekin jarraitzeko eskatu zuten. Kasu honetan, gidarien rola txandakatzeko eskatu zuten; ondorioz, bi gidarik bi astez bere gain hartuko zuten rola, txandaka, bulegoko langile guztiak gidari izan arte. Beraz, bigarren fase honek 8 asteko iraupena izan zuen. Jarraipenerako, kasu honetan ere, koloregrama bat egin zen amaieran, maiatzean, eta emaitzak esperotakoak baino hobeagoak izan ziren.

Emaitza onak eta taldekideen jarrera ezin hobea ikusita, euskara batzordeak proposatu zuen egitasmoa beste 8 astez luzatzea: kasu honetan gidari bakarra egongo zen, astebetez, txandaka zortzi langileek gidari rola izan arte. Gidari bakoitzaren balorazioa gometxa bidez egin dute gainontzeko lankideek, ostiralero, eta uztailean azken koloregrama bete dute.

Azken koloregramaren emaitzak espektatiba guztiak gainditu ditu:

Koloregrama

Eta langileen ahalegina aitortzeko, ekitaldi txiki bat antolatu genuen datuak aurkeztu eta langileak zoriontzeko. Bertan, langile bakoitzari diploma bat eta euskaraz soilik idazten duen boligrafo bat oparitu zitzaion. Erroakeko zuzendaria ere gonbidatu genuen ekitaldira, egitasmoaren berri jaso zezan eta ekitaldiari kutsu “ofiziala” eman ziezaion.

Eta, amaitzeko, uztaileko azken bi asteetan denek izan dute gidari izateko ardura.

Koordinatzaileak:  Ane Lopez eta Laida Bastida

Irakurtzen jarraitu...

ULMA Handling Systems eta ULMA Architectural Solutions Oñatin kokatuta dauden ULMA Taldeko bi negozio dira. Urteak daramatzagu bi negozio horietan euskara plana inplementatzen.

2014an, lankideen leialtasunean eragin eta euren arteko euskararen ahozko erabilera indartzeko asmoz, GuNE (Gune Naturaletan Eragiten) proiektua jarri dugu abian, negozio bakoitzeko lan-gune jakin batean, hain zuzen ere.

2313092112_ca44cc7c42_o

Ekimenari ekiteko, lehendabizi, aukeratutako gune horretako lankide guztiak bildu eta taldean hitz egin genuen gaiaren inguruan: lankideek ahozko jardunean zituzten ohituren (arauen) inguruan hitz egin, eta euskararen erabilera indartzeko, hau da, arauak aldatzeko erabakia hartu zen taldean. Horretarako, eragileak izendatu genituen; eragileok euren lan-jarduna gune horretako gainerako kideekin euskara hutsean egiteko konpromisoa hartu zuten pertsonak dira. Hilabeteetan jarraipena egin dugu eragileokin euren konpromisoa betetzen ote duten ikusteko, eta bi hilean behin koloregrama bete dute guneko partaide guztiek, euren arteko euskararen ahozko erabilera hobetu ote den ikusteko.

Aipagarriak dira, bereziki, ULMA Architectural Solutions-en lortu ditugun emaitzak. Izan ere, ekimena abian jarri zenean, apirilean, %58koa zen interbentzio-guneko euskararen erabilera, eta, egun, %80ra igo da, eragileen konpromiso irmoari esker, batez ere.

Hortaz, Emunen garatutako metodologia erabiliz, ULMA Architectural Solutions-en euskararen erabilera %22 igotzea lortu dugu bost hilabetean; esperientzia arrakastatsua, zalantzarik gabe.

Orain ohitura hori mantentzen, iraunkortzen eta, ahal bada, hobetzen saiatuko gara.

Bidaltzailea: Aitzol Guridi, ULMA Architectural Solutions-eko Giza Baliabideetako teknikaria eta euskara koordinatzailea

Irakurtzen jarraitu...