2017ko lehehengo hilabeteetan testu idatzien kalitatea hobetzeko ikastaroa egin dugu Realeko langile batzuek. Ikastaroa eskaintzeko ideia Euskara Batzordean sortu zen, Realeko hainbat departamentuko langileek testuak sortu behar ditugu; batzuetan barrura begirako komunikazioak dira; beste batzuetan bazkide eta zaleei zabaldu beharrekoak. Noski, sare sozialen bidez zabaltzen ditugun komunikazioek ikusgarritasun handia dute. Ahalik eta testu egokienak sortzea da gure helburua eta, ohikoa denez, batzuetan zalantzak izaten ditugu. Beraz, ikastaroa gure premietako bat erantzutera zetorren. 

Ikastaroan izen-emateko aukera zabaldu zen Realeko langileen artean eta 12 laguneko taldea osatu genuen ikastaroa emateko. Taldea bagenuen, irakaslea ere bai, beraz prest ginen euskaraz sortzen genituen testuak hobetzeko.

6 saio eman genituen urtarrila eta martxoa bitartean. 2 orduko saioak izan ziren. Irakasleak hiru kontzeptuen inguruan harilkatu zuen ikastaroa: zuzentasunajatortasuna eta egokitasuna. Hiru kontzeptuak abiapuntutzat hartuta, gure testuak hobetzeari ekin genion. Horretarako interneten eskura ditugun baliabideen berri izan genuen, mezu elektroniko egokiak idazteko gakoak, gure idazketa estiloa hobetzeko irakurgarritasuna errazteko gomendioak eta abar. Jasotako baliabide eta gomendioak praktikan jarri genituen hainbat testu idatziz eskoletan edota etxeko lan moduan.

Ikastaroa bukatu eta gero, bertan jasotako baliabide eta gomendioen bilduma laburtua sortu genuen eta Realeko langile guztien esku jarri genuen. Gu bezala, beste batzuek ere izan ditzaketen zalantzak argitzeko lagungarria baita. Era berean, hilero argitaratzen dugun Realeko euskara planaren aldizkarian idazkera hobetzeko gomendio bana txertatzen da

Ikastaroaren balorazioa ere egin genuen. Oro har, gustura gelditu ginen ikastaroan ikasitakoarekin. Hala ere, eguneroko lanean sortzen zaizkigun zalantzak argitzen jarraitzeko beharra ere ikusten genuen. Hori dela eta, hurrengo denboraldia begira jarri ginen eta proposatu genuen aurrerago beste saio batzuk emateko aukera. Helburu argia dugu, gure testuak lehenengo mailakoak izatea. 

Sinatuta: Alfredo Castresana eta Realeko beste 14 langile

 

 

Irakurtzen jarraitu...

Real Sociedad SADko dendetan lan egiten duten zazpi dendarik, pasa den urtean zehar, EMUNek antolatutako oinarrizko euskara ikastaroan parte hartu zuten. Ikastaroa euskararen erabilera normalizatzeko planaren barruan antolatu genuen eta 10 orduko iraupena izan zuen. Helburua euskarari buruzko nozio orokor batzuk ikastea edota errepasatzea izan zen, eta baita dendako ohiko egoeretan ematen diren elkarrizketak ulertzeko eta jarraitzeko gai izatea ere.

Erreala

Euskararen ezagutzari erreparatuta, talde heterogeneoa zen, ezagutza maila desberdinekoak baitziren parte-hartzaileak. Hala ere, bakoitzaren abiapuntua kontuan izanda, helburua guztientzako egokitzat jo zuten.

Eskuliburu bat prestatu genuen ikastaroan emango genituen eduki eta ariketa sortekin. Edukiak 10 gaitan antolatu genituen: agurrak, aurkezpenak, narrazio errazak, zenbakiak, orduak, egutegiko kontuak, dendako hiztegia eta abar lantzeko aukera izan zuten dendariek. Oinarrizko eduki horiez gain, dendetan ematen diren ohiko elkarrizketak praktikatu zituzten, bezeroen eta dendarien rolak antzeztuz. Noski, umorea ez zen falta ikastaroan zehar.

Eskuliburuko gai bakoitzaren bukaeran, osagarri gisa hizkuntzak ikasteko estrategia erabilgarriak eta euskara eta euskal kulturari buruzko jakingarriak zituzten.

Parte-hartzaileen balorazioa ona izan zen, Realeko dendetako arduraduna den Ane Anabitarteren esanetan: “Euskararen ezagutza maila baxua daukatenei balio izan zitzaien hizkera arrunteko esamoldeak gogoratzeko eta dendako hiztegi orokorra ikasteko. Maila altuagokoei eta euskara ohiko hizkuntza gisa erabiltzeko gaitasuna dutenei, berriz, arloko esamolde berriak ikasten lagundu zien eta, horrez gain, maila baxuko lankideei laguntza eman zieten. Baina, batez ere, ikastaroak ohiko lanean eta gure bezeroekiko harremanetan euskararekiko gure konpromisoa indartzen lagundu zigun. Gainera, ikastaroan giro ezin hobea izan genuen”.

Bidaltzaileak: Juanjo Ruiz eta Ane Anabitarte

Irakurtzen jarraitu...